Welkom biej de Kuulkopkes vanne Boekoel

Prins Danny I (Pfennings) "De vastelaovindj is vet cool, in ózze Kwekkerte en Kuulköpkespool!"

Kuulkopkes nuujs:

Bedank

De letste polonaise is gemaak. Eine geweldig, sjoone, sjitterende, 
vet coole vastelaovindj is aafgesjlaote. 
Ich zal nog duk aan deze vastelaovindj truuk dinke. 
Ich hob ech genaote van alles waat ich mit hub mooge make.
 
Ich num effe get hoogtepuntje:
 
- Ut oetkomme oppe prinsebal
- de vastelaovesbal van mien eige voetbalklup
- de reseptie van Prins Frank de 1e
- de vastelaovesmiddig oppe sjool same met Prinses Joyce
- Ut oetrope van Prins Ralf de 1e vanne Hoeskwakers 
- de sjleuteloverdrach biej de burgemeiser in Remunj
- de optoch door os eige kwekkerteriek aafgelaope zunjig.
- ut optraeje van Big Benny inne kwekkertepool waas te gek.
- ut aete vanmiddig same mit mien garde en raod van ellef
 
Den wil ich auch nag get miense bedanke 
die deze vastelaovindj veur mich onvergeitelik hobbe gemaak,
en ich haop det ich nemes vergaet.
 
- Mien Mam, Pap, Melissa en Oma veur alle sjteun
- Ben en Carla, bedank veur mien Prins-inwieje in ut cafe en
       alles waat geur veur mich hub gedaon
- Vors Jeffrey, mien rechterhandj, doe waars geweldig
- Mien garde en raod van ellef
- ouch bedank, de raod vanne kwekkerte, gardemaidje, 
       vors Ben en de adjutanten
- Prins Frank de 1e, Petra en Mandy det  veur der same get 
       sjoons van hobbe weite te make, ONVERGEITELIK!!!!!
- Prins Ralf de 1e mit zien Hoeskwakers
- De prinsekapel, Nag Efkes, de Power Boys en DJ Casper,
       bedank veur de meziek
- Marlie Eggels bedank det se mich alles zo sjoon
       op film hobs gezat
- Ton, Marc en Jo bedank veur ut versiere biej mich toes
- Jan en Claar van de Hoeskamer bedank veur eur gasvriejheid
- Het Kuulköpkesbesjtuur, bedank veur uch ongersjteuning
- De Aad-Prinse, zonger euch woor der geine
     jeugvastelaovindj gaot zo door. Miense herstikke bedank.
  
En toet sjlot wil ich uch Kuulkopkes, 
Kwekkerte en Kwekkerinnekes neet vergaete 
die al die daag hiej mit os vastelaovindj hobbe gevierd. 
Ut waas eine hele sjoone vastelaovindj.
Miense allemaol bedank, geur waart geweldig.
  
De vastelaovindj is vet cool,
in ózze Kwekkerte en Kuulköpkespool.

Boekoel ALAAF !!!!!!

(laes door de sjpelfoute haer, 't waert nog naogekeke .....)

Danny 1e Jeugprins 2010

Danny Pfennings is aafgeloupe zaoterdig in eine stjampvólle Kuulköpkespool door Vors Jeffrey
oetgerope es jeugprins vanne Boekkoel. Jeugprins wille waere, wèlke jóng wilt det noe neet?
Veurdet det zo wied waas höbbe veur zaoterdig eers same in de kirk ein sjoon dialekmès biejgewoond.
Kwekkerte Prins Frank 1e, Hoeskwakerprins Rob 1e en toen nag Jubelejumjeugprins Jeffrey 1e höbbe
nag get veurlaeswerk gedaon. De meziek waerde verzorg door de Prinsekepel. Ouch meneer pesjtoor
Reneerkens en ‘t gezinsmèskómmitee weer bedank veur de mitwèrking.

Nao de Mis, kós Jeffrey nag ein uurke in de Kuulköpkespool veurop loupe, mer óm 11 menute veur ach
waerde der toch óndaon van alle Prinselikhede. Zo geit det, der mót ‘ne nuje kómme! Gaer of neet gaer.
De sjpanning waas groot, want veur ‘t eers sins jaore kós der weer gekaoze waere oet jónges van groep
7 of 8 vanne basissjool. Kandidate genóg, die allemaol sjtónge te sjpringe óm jeugprins te waere.

De gerdiene ginge óm half nege aope, Jeffrey zelf kondigde ziene opvolger aan. ‘t Is, ‘t is, ‘t is 
                                           Danny 1e! 
Kuulköpkespool sjtóng geliek oppe kop. Danny kènt der get van. Mer waat wils se ouch. Zoget de ganse
femilie zit in de vastelaovindj. Hae is ein naefke van Kwekkerte Prins Frank 1e, en kleinzoon van
Besjermvrouw Tila van de Aad Prinse van de Kwekkerte. Danny is ‘t breurke van Melissa, zoon van Frank
en Tiny Pfennings (jaore gardemaedje gewaes biej de Kwekkerte). Paetoom Ben is ouch aad Prins, 
waat ein Prinselikke femilie!

2010 geit Danny veurop in de polenaes, en geit regere euver de Kuulköpkes, mit ziene spreuk: 

“De vastelaovindj is vet cool, in ózze Kwekkerte en Kuulköpkespool!” 
Boekoel Alaaf.

Programma 2010

Zaoterdig 9 jannewarie.
4x11 liedje zinge op de Bonte Aovindj vanne Kwekkerte in de Kwekkertepool. 
Biejeinkómme óm 20.30 oer aan ’t Kwekkertepelies (kefee Soranus). 
Inj óm óngeveer  21:00 oer. 

Zaoterdig 23 jannewarie.
Bezeuk aan de prinsebal vanne Kwekkerte in de Kwekkertepool. 
Biejeinkómme óm 20.30 oer aan ’t Kwekkertepelies (kefee Soranus). 
Inj óm óngeveer  22:45 oer. Den gaon veur same nao boete! 

Zaoterdig 30 jannewarie.
17:44 oer Vastelaovesmès in de Theresiakèrk mit aansjloetend Jeugprinsebal
 in de Kuulköpkespool (jeughoes de Kamp). Biejeinkómme óm 17.30 oer aan de Kamp. 
Aafgeloupe óm 22.00 oer.

Vriedig 5 fibberwarie.
Bezeuk aan de vastelaovesbal van voetbalklup Boekoel in de kantine. 
Biejeinkómme óm 19.15 oer aan de Kamp. Aafgeloupe óm óngeveer 22.00 oer.

Zónjig 7 fibberwarie.
Bezeuk aan de prinseresepsie in ’t Kwekkertepelies. 
Biejeinkómme aan de kefee van ’t Kwekkertepelies óm 15.00 oer. 
Aafgeloupe óm óngeveer 16.20 oer. 

Vriedig 12 fibberwarie.
Vastelaovindj vanne sjool in ’t jeughoes. 
Saoves prins oetrope van de Hoeskwakers. 
Biejeinkómme óm 19:50 oer Kwekkertepelies (kefee Soranus). 
Aafgeloupe veur de Kuulköpkes óm óngeveer 22.00 oer.

Zaoterdig 13 fibberwarie.
Sjleuteleuverdrach in Remunj.
Hiej geit allein de jeugprins mit vors jeffrey nao toe.

Optoch Zónjig 14 fibberwarie.
Biejeinkómme óm 14.00 oer oppe Beneje Boekoel biej aad-prins Pierre 2e (van Deur). 
Nao de optoch gezellige middig in ’t Kwekkertepelies. 
Deze middig is veur de jeugprins en zien gevolg tösse 18.30 en 19.00 oer aafgeloupe.
 Veur gaon den mit eine polenaes allemaol same oppe meziek vanne prinsekepel nao boete.

Maondjig 15 fibberwarie.
Vanaovindj hosse en sjpringe in de Kuulköpkespool. 
Veur beginne óm 17.00 oer en sjtoppe deze aovindj óm 20.00 oer. 
Róndj 18.30 oer kump de Kwekkerteprins op bezeuk.

Dinsdig 16 fibberwarie.
Vanaovindj hosse en sjpringe in de Kuulköpkespool. Veur beginne óm 17.00 oer. 
Deze aovindj kump vanaaf 18.00 oer de Kwekkerteprins op bezeuk. 
Óm 20.30 oer sjloeting vanne jeugvastelaovindj 2010 door de jeugprins. 

‘t Kuulköpkes Besjtuur.
Aad Prins Leopold 1e
Aad Prins Marcel 1e
Bienao Aad Prins Ton 3e
Aad Prins Jack 3e
Mit de hulp van al die anger aad-prinse vanne Kwekkerte! 

Höb geur nag vraoge, meel j.schattorie@home.nl of trèk Jack 3e mer aan de sjlupjas.

Bedankwaord 4x11 Jubelejumprins Jeffrey 1e

Kwekkerte en Kuulköpkes vanne Boekkoel. De vastelaovindj is veurbiej. ’t Waas sjitterend, sjoon, 
oergezellig, keigood, drök, mer väöl te kórt. Ich höb genaote van èlke daag, van sjmorges 
vreug toet saoves laat, det ich jubelejumjeugprins vanne Boekkoel moogde zin. 
Ich höb eine geweldige tied mit uch gad. Ich haop det ich eine goje jubelejumprins van de 
Kuulköpkes bön gewaes. 
Ich haaj uch belaof det ich mich neet 100% mer 200% zól gaeve. Ich dach det dit waal gelök waas. 
Dees sjoon daag wore neet meugelik zónger de sjteun van heel, heel, heel, väöl miense. 
’t Zin der teväöl óm op te numme, zelf weit geur waal waem ich allemaol mót bedanke. 
Bedank allemaol veur de sjone vastelaovindj, zo, ich bön nemes vergaete!
Toet sjlot nag 1x miene sjpreuk:

“4 x 11, MIT JEFFREY DE 1E GEIT DET VANZELF”
Boekoel ALAAF 
Prins Jeffrey 1e

Waem woor wanneer prins: