Insjrieve op dónderdig veur de vastelaovindj van 8 toet 9 oer in ’t Kwekkertepelies (kefee Soranus) oppe Baove Boekoel

Roete optoch 2010.


Baove Boekoel - Graeterhofwaeg - Benede Boekoel - Rieterwaeg - Heikamp - Aldrinsjtraot - Graaf Wolff Metternichlaan - Kèrkwaeg - Heikamp - Graeterhofwaeg - Benede Boekoel - Elmpterbaan -Baove Boekoel.

Regelement vastelaovesoptoch de Kwekkerte Boekoel.


1. ‘t Sjtruije van papiere confetti moog, mer neet te väöl ! Sjtruije of gooje van confetti van kunssjtóf zo-es plastic, foom, styrofoom en pu-sjoem is verbaoje. Ouch ‘t sjtruije en gooje van anger dinger en sjtóffe, wovan ouch gemaak, wodoor gevaor c.q. sjaaj kan óntsjtaon veur de kiekers, veur ‘t miljeu en/of eigendomme van derden, is verbaoje.
2. ‘t Verbranje van sjtóffe wodoor hinjerlikke en/of sjaejelikke rouk of gaze vriej kómme is neet toegesjtange.
3. ‘t Mitnumme van beeste is toegesjtange es die good verzorg waere. ‘t Mitnumme van beeste-aafval of dooj beeste is neet toegesjtange.
4. D’r mooge gein zedekwetsende aafbeeldinge, veursjtèllinge of opsjrifte waere gebroek. Dit geldj ouch veur aafbeeldinge en zo mit rasisties, discriminerend of kwetsend karakter.
5. ‘t Gebroeke of mitnumme van waopes is allein toegesjtange es ‘t euverein kump met waat inne waopenwèt sjteit.
6. Alle gevaers det mitduit aan de optoch mót in eine gooje degelikke sjtaot van konstruksie zin en mót besjtuurd waere door eemes dae det ouch moog. De eigeneer / haajer van det mitriejend gevaers mót verzekerd zin zo-es det sjteit in de wèt aansjprakelikheids- verzekering motorgevaers.
7. Volges de vergunning van de gemeinte Remunj moge de wages inclusief de tractor neet langer zin den 15 maeter, neet breijer dan 5 meter en neet hoger den 5,80 maeter inclusief de meinse die drop sjtaon. Ouch mót op edere wage eine brandjblusser aanwezig zin. LÈT OP : Op de Gr.W.Metternichlaan is biej de versjmaling de aafsjtand tösse de sjtoeprenj mer 3,50 maeter en tösse de 2 paolkes terplekke mer 4,50 maeter.
8. Edere deilnummer mót versjtenjig en verantjwaord aan de optoch deilnumme, en is verplich de aanwiezinge van de optochregeleers, peliesie, brandjwaer en de miense van Sjtadstoezich op te volge. Véur en náo de optoch moge op de wages gein persone zitte of sjtaon !!!
9. De organisasie is neet aansjpraokelik veur sjaaj, letsel e.d. waat door de deilnummers veroorzaak waerd.
10. Wil men mitdoon veur prieze, den mót men zich op dónderdig veur vastelaovindj insjrieve in ’t Kwekkertepelies tösse 8 en 9 oer saoves. De deilnummers kriege den op zaoterdig häör nummer. Dit nummer good zichbaar drage, anges kènt de zjurie uch neet beoordeile en doot g’r dus neet mit veur de prieze.
11. Opsjtelle op zunjig oeterlik om kwart euver twee sjmiddes biej eur nummer, det langs de kantj van de waeg is aangegaeve. Dringend verzeuk : Aanrieje via de Elmpterbaan nao de Baove Boekoel, zodet alle deilnummers direk mit de naas de gooje kantj opsjtaon. Gaot biej ‘t opsjtèlle geheel rechs van de waeg sjtaon. Op dees meneer kènne alle anger deilnummers nag good naeve uch, om häör eige opsjtèlplaats te bereike.
12. Ontbinjing optoch. De eerste wage van de optoch moet biej de ontbinjing doorrieje toet biej de Hoeskamer, dao oetsjtappe. Alle anger wages good aansjloete, dus doorrieje toet vlak achter eure veurgenger. 13. De priesoetreiking gebeurt es de jury häör eindrapport haet vasgesjtèld.
14. De beoordeiling is es volg:
1. Wages
2. Kleine groep (toet 5 persone).
3. Grote groep (vanaaf 5 persone).
4. Duoos.
5. Einzelgänger.
6. Kuulköpkes.

Insjrieve op dónderdig veur de vastelaovindj van 8 toet 9 oer in ’t Kwekkertepelies (kefee Soranus) oppe Baove Boekoel.
---------------------------------------------------------------------------------------------------------------

Geljdbuujel ónger de optoch !


Al ein paar jaor zeet g’r 2 aad-prinse veur de optoch oet laupe mit eine geldjbuujel. Oet de opbrings van de geldjbuujel waere de prieze betaalt aan de deilnummers van de optoch. ’t Sjtreve van ’t optochkommitee is óm zoväöl meugelik deilnummers ein prieske te gaeve. Gevolg daovan is netuurlik det de te winne prieze neet erg groot zin. Mer de opzet is eigelik óm de deilnummers ein klein waardering te gaeve veur de meujte, die ze allemaol doon óm ós eine sjoone optoch te gaeve. Daoróm vanaaf dees plaats weer eine oproop aan alle bezeukers van oze geweldige optoch. Gooj get in de geldjbuujel. Laot de deilnummers neet in de kaaj sjtaon. Mit opbouwe höbbe ze ’t dök al kaad genóg. Dus : zeet g’r de geldjbuujel aankómme, zeuk den alvas in eur tesse en zorg det dae geldjbuujel good vól kump, zodet v’r de deilnummers weer ein plezeer kènne doon mit get sjoon sjtimuleringsprieskes.

Autoos make ’t de optoch moejelik oppe Baove Boekoel.


De lèste jaore haet de optoch väöl las van geparkeerde autoos biej ’t vertrèkke en de ontbinjing oppe Baove Boekoel.. Veural de grote wages, die zich dök ouch nag mótte passere, höbbe dao den gein plaats veur, mit es gevolg det de optoch te laat vertrèk of de lèste wages biej de ontbinjing al op de Elmpterbaan vas sjtaon. Auch autoos, diej in of vlakbiej de boch van de Baove Boekoel nao de Graeterhofwaeg sjtaon, veroorzake väöl euverlas, omdet det eine hele moejlikke boch is veur de grotere wages. Veurig jaor höbbe v’r al es optochkommitee eine oproop gedaon om tösse 1 en 4 oer de Baove Boekoel zo väöl meugelik vriej te haaje van geparkeerde autoos. Eerlik gezag : ’t resultaat van oze oproop waas neet zo geweldig. Dao sjtónge toch nag ein paar autoos beheurlik inne waeg. Daoróm probere v’r ’t nag eine keer. Haaj estebleef de Baove Boekoel vriej van geparkeerde autoos tösse 1 en 4 oer sjmiddes. Alle deilnummers en de organisasie zin uch dao dankbaar veur.